امره وتدبيره من ابداع عز الدين الحميري

أمره وتدبيره:
لاحول ولاقوة والكل في غلبة وحيره
بين هلع وخوف ونفوس للأمر ماتبالي
هذا الحال من الله والثقة بأمره وتدبيره
لابد من ساعة الفرج والهم عنا ينزالي
ياصاحبي ترى الحياة محدودة وقصيره
مايموت قبل يومه انسان عزيز وغالي
ليش الخوف والهلع واختلاف سيره
المرض والبلا أمر مقدر من الله العالي
ياهنا من بات قرير العين و السريره
مرتاح البال ومسلم بقدره الفكر خالي
ياما مرت علينا شدايد وكروب مريره
شبيه غيوم مرت وبعدها شمس وهلالي
شفنا العجب بين مستغل وباع ضميره
يتذرع لنفسه الحجج ولازم تزيد غلالي
يارب رحمتك وعافيتك لكل بيت وديره
تعم بشفا ومغفرة والجو صافي وزلالي
عسى هالكلام يوفي ويريح البال وتفكيره
دعوة صادقة من القلب ودمع العين ينهالي
يمكن يستغرب الكثير بوحي ومسار تغييره
ساعة الشدة تحتاج لعمل وصدق أفعالي
ماني حكيم وواعظ بس النفس مستجيره
بالله من هالحال والكرب غير حرفي وأقوالي
ردت أترك من أبياتي أثر ويظل يفوح عبيره
لو فارقت الروح الجسد ودنت ساعة ترحالي
                   @عزالدين الحميري@